Daafaca kooxda Ajax Matthijs de Ligt ayaa doortayinuu ku biiro kooxda Juventus xagaagan, sida ay goordhow shaacisay Sky Sports Italy.
De Ligt ayaa ka mid ah xiddigaha aadka loo doon doonayay ee qaarada Yurub ka dib markii uu Ajax ka caawiyay inay isku qaadaan horyaalka iyo koobka maxaliga, halka ay sidoo kale gaareen semi-finalka Champions League xilli ciyaareedkii dhamaaday.
19 jirkaan ayaa sheegay inuu go’aan ka gaari doono mustaqbalkiisa ka dib kulamadii Nations League iyadoo Manchester United, Barcelona iyo Paris Saint-Germain lala xiriirinayay.
Si kastaba, Sky Sports qeybteeda Talyaaniga ayaa shaacisay goor dhaweyd in daafaca dhexe ee Netherlands inuu go’aan ku gaaray inuu ku biiro kooxda heysata horyaalka Serie A ee Juventus.
Waxaa la fahamsan yahay in kooxda Talyaaniga ay heshiiskaan uga bixi doonto 62 milyan ginni, waxaana weli harsan inay heshiis shaqsi ah la gaaraan ciyaaryahanka.
Kabtanka Ajax ayaa si shaqsi ahaan u diiday inuu u dhaqaaqo Barcelona madaama aysan u balanqaadi karin boos joogta ah halka Paris Saint-Germain ay adkeyn weysay xiisaheeda.
De Ligt ayaa u muuqda inuu noqonaya saxiixii ugu horeeyay ee tababare Maurizio Sarri kaasoo shaqada Juventus qabtay markii uu ka tagay Chelsea isbuuc la soo dhaafay.
Daafaca ayaa sheegay in ka dib finalkii UEFA Nations League in Cristiano Ronaldo uu weydiistay inuu ku soo biiro Juventus, waxayna u muuqataa in codsigii Ronaldo uu aqbalay haatan.