Booliska Faransiiska ayaa sheegay in askari boolis ah
toogasho lagu dilay laba kalena lagu dhaawacay badhtamaha Paris, iyo in sidoo
kale ay ciidanka nabad gelyadu dileen ninkii askarta soo weeraray.
Boolisku waxay sheegeen in nin dabley ah oo kelidii ahaa
rasaas ku furay askarta ka hor intii aan isagana la dilin isaga oo is leh
goobta ka baxso, waxaana boolisku xidheen gooba weerarku ka dhacay oo ah
Champs-Elysees.
Madaxweyne Francois Hollande ayaa sheegay in uu
rumaysanyahay in weerarku ahaa mid "agagixiso xidhiidh la leh".
Kooxda la baxday Dawladda Islaamka ayaa sheegtay in mid ka
mid ah "dagaalyahannadeedu" uu weerarkaa qaaday.
Dhawr ka mid ah musharaxiinta ka qayb galaya tartanka
doorashada madaxtinimada ee Axadda dhici doonta ayaa ololohoodii joojiyey si ay
u muujiyaan tixgalinta ay u hayaan shacabka iyo xukuumadda Faransiiska.
Musharaxa xisbiga midig dhexe, Farancois Fillon, ayaa sidoo kale ugu baaqay
musharaxiinta kale in ay tallaabo tooda la mid ah qaadaan.
"Sida ay u muuqato, askarta booliska ah si ula kac ah
ayaa loo bartilmaameedsaday" ayuu yidhi af-hayeenka wasaaradda arimaha
gudaha, Pierre-Henry Brandet.
Madaxweyne Holland ayaa ka dib markii uu kulan degdeg ah la
yeeshay ra'isal wasaaraha iyo wasiirka arimaha gudaha, wuxu sheegay in qaranku
taageero buuxda la garab taaganyahay ciidamada nabad gelyada isla markaana
maamuus qaran lagu aasi doono askarta booliska ah ee la dilay.
Waxaanu intaa ku daray in uu aroornimada Jimcaha ah kulan la
yeelan doono golihiisa nabadgelyada ee xukuumadiisa.
Weriyaha BBC-da, Hugh Schofield, ayaa ku soo waramaya in
Champs-Elysees oo dunida aad looga yaqaan dad aad u badanina dalxiis u tagaan
muddo dheer loo arkayey in ay noqon karto goob la bartilmaameedsan karo.
Qiyastii saacaddu markii ay ahayd 9:00 habeenimo
xiliga Paris ayaa nin baabuurkii uu watay soo ag joojiyey bas yar oo boolisku
leeyihiin ka dibna rasaas ayuu ku furay, ayuu yidhi Mr Brandet oo ah
af-hayeenka wasaaradda arimaha guduhu.